مساء الخيـ؛ـرات على الجميع بنين و بنات ،
حــمــــااااتــــى..
أم الزوج حبيبك يعنى أمك الثانيه ،
طبعاً أول ما بنقول كلمه حماتــى بنفتكر على طول الممثله المشهوره ،
.. مارى منيب ..
اللى آدت دور الحماه بشكل كوميدى و جميل بس من وجهه نظرى البسيطه و الصغيره جداً ،
بالرغم من دورها اللى قدمته بدم خفيف فى معظم أفلامها و اللى بحب اشوفها و بيضحكنى كتير ،
إلا أنها شوهت الحماه و طلعتها دايماً الوحشه اللى مش فى قلبها رحمه و بتوقع بين الآبن و الزوجه ،
انا معاها ان فى بعض الحموات كدا ربنا يبعدهم عنها لكن انا ادامى حموات كتير و بشوف ازاى بيعاملوا ،
و بيعتبره زوجه الابن زى بنتهم بالظبط و يمكن بيعاملوهم احسن من بنتهم كمان ،
عامل الناس كما تحب ان تعامل يعنى عاملى كويس هتلاقى حماتك قشطه معاكى ،
طبعاً انا مش بعفى كل الحموات و مش بقول كلهم حلوين أو كلهم وحشين ،
بجد انا شايفه ان دلوقتى يا جماعه معظم الحموات بقوا هما اللى بيتعاملوا مش كويس قوى و شويه بيعاملوا وحش ،
المهم احنا سيبنا من دا فلو حماتك صعبه و شديده معاكى ،
فالاكيد لازم نقدر مشاعرها و ان ابنها اختار بنوته جديده تملى حياته ،
و ان ابنها حب و هيكون اسره ،
حطى نفسك مكانها و ان هيبقى عندك ابــن و هيجى يوم يقولك انا عاوز اتجوز بنوته حبتها يا ماما ،
فلازم نعرف ايه بيدور فى دماغها و لازم نشيل اى افكار غلط دخلتها ،
ونشيل ان ابنها هيبعد و هيحب مراته اكتر و الكلام اللى هيدور كله و هيسيطر للآسف على معظم امهاتنا ،
ازاى بقى نعامل حماتنا كويس و نخليها تحبنا زى بنتها و اكتر و كمان لو جوزنا زعلنا هى اللى تقف معانا ،
لما حماتكـ تيجى تتقدم ليكى تكلميها كويس و حسسيها تعرفيها من زمان ،
عرفيها ان الام احلى و اهم حاجه فى الدنيا كلى عقلها بس مش بتكدبى فعلا هى احلى حاجه فى الدنيا الام ،
و لا انتوا مش معايا فى دا بقى ^-^ ،
يعنى تاكدى عليها الكلام و انها امك و تقوليلها يا ماما مش يا طنت ،
و تحسسيها باهميتها و كمان تاكلى عقلها باسلوبك و روحك الحلوه ،
خدى رايها ف شبكه و عفش و نظام الشقه و ازاى هتحطى العفش ،
حسسيها كانك بنتها و ليها كلمه عليكى شاركيها معاكى بس فى نفس الوقت مش تلغى شخصيتك ،
يعنى خدى رايها و تعرضى رايك بادب لحد ما فى حد يقتنع المهم تحسسيها بالدور دا ،
قوليلها ان ابنها و لنفترض اسم احمد بيتكلم عنك ،
و احمد بيقولى كلام جميل عليكى و اد ايه بيحبك و تعبتى فى تربيته ،
ربنا يخليكى يا ماما على احمد و انك هادتينى بيه ،
و خلتينى زوجه ليها كدا هتحس ان لسه ابنها بيحبها و بيتكلم عنها و دورها هيفضل مهم ،
قوليلها بيقول عاوز نربى ولادنا زى ما ماما حببتى ربتنا و عاوزها تساعدنا فى دا ،
هتحس ان هو ابنها زى ما هو و هيفضل زى ما هو ،
يعنى احمد اللى قبل الجواز و بيحبها هو نفسه احمد اللى بعد الجواز و لسه بيحبها و بيموت فيها ،
لازم تخلى جوزك يودها على طول و يكلمها و يقعد معاه و يزورها مش تخطفيه منها زى ما هى متخيله ،
لازم تروحى كتير عندها مش زيارات ضيوف عشان دى بتضايق عن تجربه ،
لو لقدر الله حصل مشكله معاها اوعى اوعى اوعى يا بنت انتى و هى تغلطيها حتى لو هى غلطانه ،
و اوعى تحطى جوزك فى محل اختيار بينك و بينها هتبقى انتى اللى بتهدى عش حبك و زواجك و هتخسرى جدا ،
و مش هتخسرى حماتك بس و جوزك و نفسك و هتعيشى فى مشاكل ،
و لو عملت حاجه قوليلها انا اسفه يا حببتى و بوسى راسها كمان ،
متعانديهاش لانها مهما كان ست كبيره و زى امك ،
و لما تقعدى مع جوزك مش تشيليه منها ابداً بس فهميه ان محصلش حاجه و ان حصل كذا كذا و باسلوب كويس ،
و تشرحيلى الموقف بهدوء و تقوليله يكلمها براحه و يفهمها ان بلاش كذا ( اللى عملته ) ،
صدقينى هيحترمك جداً انك حافظتي على امـــه و على جوزك ،
و انك مش حطتيه فى وضع اختيار بينكم و لا ان هو يشيل منها و كمان هيقولك حقك عليا انا ،
.
.
لو حسيتى انها زعلانه من اى حاجه و لا منك اقعدى معاها ،
و حلى الموضوع بسرعه قبل ما يطور و خليكى عاقله و هاديه لاى حاجه ،
دى زى والدتك و ام جوزك يعنى اغلى حد عنده و لازم تراعى اهله زى ما هو هيراعى اهلك ،
حاولى تخرجى معاها و تشترلها هديه مثلاً فى يوم تانى حسسيها انك فكراها و بتعتبريها امك فعلاً ،
ان شاء الله لما تكونى حامل كدا خديها معاكى لدكتور النساء و وريها الطفل ،
و لما تيجى تشوفى ولد و لا بنت بردوا خديها ،
لما تيجى تختارى الاسماء اعرضى عليها و خدى رايها ،
و قوليلها ايه رايك يا امى يا حببتى عندى اسماء كذا ،
انتى نفسك اسمى ايه منهم و لا عندك اسماء جديده ايه ،
و قولى انا عاجبنى كذا هتحس انك اهتميتى بيها ،
و لو مش عاجبها صدقينى هيعجبها جداً من تقديرك ليها ،
و انك اهتميتى بيها و الاسم اللى مثلا مش عاجبها هتقولك سميه ،
علشان بس قدرتيها و حسستيها انها امك و اغلى الناس ،
يا سلام لو حماتك و امك الثانيه جت ليكم تعملى ايه؟؟
لو طال تفرشى الارض ورد و فل و رمل افرشى ،
جسسيها ان بيتها مش بتيك انتى ،
جبيلها هدوم و لو هى مش مقاسك لازم تجبيلها طقم ملابس بيت تقعد بيه عندك مثلا ،
امسكى فيها تبات عندك و تنور بيتك اعمليلها احلى اكل و احلى حلويات و عصاير ،
بلاش كل شويه مع جوزك مثلاً احمد .. يا احمد دا ماما عملت و سوت و زعقتلى و كسفتنى ،
لا اكسبيها و اكسبى جوزك بعدم الشكوى متخلهوش يتدخل غير فى حاجه كبيره ،
و كمان لما يتدخل اياكى يكلمها ادامك و لو حصل و هو اتصرف و كلمها ادامك قوليله ماما على عينى و راسى ،
و دا حببتى و انا الغلطانه و انا بحكيلك علشان اعرفك ان مش كنت اقصد ازعلها و لا ازعلك ،
و عمرها ما زعلتنى ايه دا يا احمد ازاى تقول كدا و انا مقصدش ان زعلانه ،
و بوسى راسها و حاولى تكسبى الموقف لصالحك و تطلعيها من الآحراج ،
و مش هو بس اللى هيقدرك دا هى كمان هتتكسف جداً و هتتاسفلك يمكن بينها و بنيك ،
أو على الاقل هتعاملك باحترام و حب أكتر من الآول ،
لازم تتكلمى عن حماتك باسلوب كويس جداً سواء ادام حماتك و لا مش ادامها ،
حتى لو هى مش كدا اياكى تغلطى فيها و لا تغتابيها خليها دايماً احسن واحده ادام الكل و ادام نفسها ،
سبيى زوجك يزورها شويه و يتكلم معاها بحريه ،
و لو انتم موجودين وخدها على جمب و اتكلم معاها و الفضول كلك و عاوزه تعرفى بيقولوا ايه ،
اتصرفى باسلوب كويس و سبيه يتكلم معاها شويه و اعرفى ان الكلام ميخصكيش ،
اعملى مش واخده بالك اتكلمى مع اى حد موجود ،
لما تجيبى اطفال لازم تخليهم يحبوا جدتهم جداً و تقوليلهم تاتا او نينه حلوه و قولى كل حاجه حلوه عنها ،
ابتسمى دايماً فى وشها و خلي الابتسامه مش تفارق وجهك ابداً و عامليها بتقوى و احترام دايماً اعتبريها امك ،
خليكى هاديه دايماً و الهدوء دايما بيموت اى غضب جواكى ،
و استخدمى لباقتك و ودك و ادبك و عبارات لطيفه معاها ،
دى نصايح مهمه عشان تعيشى سعيده وحاولى دايما تستحمليها لانها زى امك وكمان ام الانسان اللى بتحبيه ،
أما لو قرات كلماتى أم الزوج ،
يا ريت أى ام بتعامل زوجه ابنها مش تمام و شديده عليها ،
فيا ريت تعتبيرها بنتك و تعامليها كويس و تقوليلها ايه يرحيك و تسبيلها حريه شويه ،
و تعرفيها انك بتعتبريها بنتكـ ،
و بتخافى عليها و عاوزاها سعيده و مبسوطه ،
عاوزاكى تتاكدى يا ام الزوج ان لو عاوزه ابنك سعيد و مرتاح فى حياته احترمى خصوصيتها ،
سبيلهم شويه حريه و خصوصيه و احترمى و حافظى على دا ،
و مش يبقى تدخلك مجرد فضول زايد و حب شديد للآبن و غيره قاتله عليه من العروسه الجديده ،
تحياتى القلبية